ධර්ම ස්වභාවය

අපට ලැබී ඇති පුණ්‍යවන්ත භාවයේත්,වාසනාවන්ත භාවයේත් අගය ගැන අපේ සැලකිල්ල යොමු කළ යුතුය. මේ සඳහා කළ යුතුව ඇත්තේ ලෝකයේ වෙසෙන අනෙකුත් සතුන් එනම් බල්ලන්,ඌරන් සර්පයින් වැන්නවුන් කෙතරම් අවාසනාවන්ත ද කියා දැනගැනීමට අප අපේ වටපිටාව දෙස හැරී බැලීම ය. එම සතුන්ට ධර්මය ගැන ඉගෙන ගැනීමටවත් ඒ ගැන දැන ගැනීමටවත් එය ප්‍රගුණ කිරීමටවත් වාසනාවක් නැත පුර්වයේ කරන ලද කර්මයන්ගේ විපාකයන් අත්විඳින මෙම සත්වයන් අවාසනාවන්තය. ධර්මය ඉගෙනීමට ඒ ගැන දැන ගැනීමට,එය ප්‍රගුණ කිරීමට හෝ අවස්ථාවක් නොලැබෙන කෙනෙකුට දුකෙන් නිදහස් වීමට අවස්ථාවක් නොලැබේ.

මනුෂ්‍යයන් වශයෙන් සිටින අප යහපත් සිරිත් විරිත් වලින්   හික්මීමෙන් තොර අවාසනාවන්ත තත්ත්වයක ගොදුරු බවට පත්වීම සඳහා ඉඩ නොහළ යුතුය.ඔබත් අවාසනාවන්ත භාවයේ  ගොදුරක් නොවීමට ඔබම  වග බලා ගත යුතුය. එයින් අදහස් වන්නේ නිවන් ලැබීම සඳහා විමුක්ති මාර්ගයට පිවිසීමේ බලාපොරොත්තුවෙන් හා ශීලය දියුණු කිරීමේ බලාපොරොත්තුවෙන් හෝ නො සිටිය කෙනෙකු වශයෙන් සිටීමය.අප දැනටමත් සිටින්නේ ඒ ගැන බලාපොරොත්තුවක් නොමැති අය ලෙසිනි කියා නො සිතන්න. ඒ ආකාරයට කල්පනා කළ හොත් අනිකුත් සතුන් මෙන් අප ද අවාසනාවන්ත භාවයේ හිමිකරුවන් වනු ඇත.

අප සිටින්නේ බුදුන් වහන්සේගේ බල මහිමය යටතේය.එම නිසා මනුෂ්‍යයන් වී සිටින අප හැකි තරම් වූ පුණ්‍ය බලයකින් යුක්තය.අපේ අවබෝධය,අදහස් සහ දැනීම මේ වර්තමානයේදී නිවැරදි කර ඒවා නිසිමඟට යොමු කළ හොත් එය මනුෂ්‍යයන් වශයෙන් සිටින මේ ආත්මභාවයේ දී ම ධර්මය දැක ගැනීමට අවබෝධ කරගැනීමටත් හැකිවන පරිදි අපේ චර්යාව මෙන්ම අපේ පුහුණුව පවත්වා ගැනීම සඳහා අපට මඟ පෙන්වීම ලබා දෙනු ඇත.

ධර්මය තුළින් අවබෝධය ලබා ගෙන ඒ මගින් සැනසීම උදාකර ගත යුතු ව සිටින අප අනිකුත් සත්වයන්ට වඩා වෙනස් වන්නේ මේ අයුරිනි.බුදුන් වහන්සේ දේශනා කොට වදාළේ  ධර්මය අප ඉදිරියේ දැන් මේ මොහොතේ පවත්නා බවය බුදුන් වහන්සේ දැන් මෙතන මේ මොහොතේ අප දෙස බලා සිටින ආකාරයෙන් වැඩ සිටිති එසේ නම් ඔබ බුදුන් වහන්සේ සහ උන් වහන්සේ ධර්මය දැකීමට යන්නේ වෙන කුමන කලකදී ද කුමන තැනක දී ද?

නිවැරදි ආකාරයට කල්පනා නොකළ හොත්, නිවැරැදි ආකාරයට පුහුණු නොවුණහොත් අපි තිරිසන් සතුන්ගේ,නිරිසතුන්ගේ ප්‍රේතයින්ගේ හෝ යක්ෂයින්ගේ තත්වයට ඇද වැටෙමු. එය සිදු වන්නේ කොයි ආකාරයටද ? මේ ගැන ඔබේ මනස තුළට හුදෙක් එබී බලන්න.තරහක් පහළවන  විට එහි කොයිවගේ දෙයක් ද? එය ආ යම් කිසි විටෙක හුදෙක් එදෙස බලන්න.මෝහය පහළවන විට එය කොයි වගේ දෙයක් ද ? එය ආ විටෙක හුදෙක් ඒ දෙස බලන්න.ආශාව පහළ වූ විට එය කොයි වගේ දෙයක් ද ඒ දෙස බලන්න

මෙම මානසික ස්වභාවයන් හැඳින ඒවා ගැන පැහැදිලි අවබෝධයක් ඇති නො කර ගැනීම නිසා අපේ සිත තුළ ඇති මිනිස් ස්වභාවය වෙනස් වෙයි. සියලු සංස්කාරයන් යුහුසුළු වෙමින් පවතින්නේ භවය ඇතිකරවීම සඳහාය. වර්තමානයේ පවත්නා සංස්කාරයන් මගින් හැඩගස්වනු ලබන භවය තුලින් උත්පත්තිය හා පැවැත්ම සිදු කරනු ලැබේ.මේ අනුව උත්පත්තිය හා පැවැත්ම සිදුවන්නේ ඒවායේ හැඩගැස්ම අපේ මනස විසින් සිදුකරනු ලබන ආකාරයටමය.

සාධු ! සාධු !! සාධු !!!

*** ආචාන් හිමියන් ***